"Бэлэм буол" - 90 сыла!

Оҕо - аймах, көлүөнэттэн-көлүөнэҕэ, далаһа уурунан ааҕар суолга үктэнэр биир эйгэтэ —"Бэлэм буол"-"Кэскил" хаһыаттарбыт бүгүн бэчээттэнэн тахсыбыта лоп курдук 90 сыла !

Биһиги гимназиябыт төрүкү "Бэлэм буолу"-"Кэскили" кытта ыкса ситимнээх.

Николай Константинович саҕаттан тиһиллибит подшивкалар архыыппытыгар  кичэллээхтик ууруллан тураллар.

Бүгүн,  библиотечнай уруокпутугар сыһыары тутан, оҕолор редакция үлэһиттэрин кытта көрсөр  история чахчытын биир үтүө түгэнэ тосхойдо.

Медиа -библиотека кииммит салайааччыта Бурнашева О.В. хаһыат , сурунаал оҕо сайдыытыгар , билиитигэр киирэр дириҥ үөрэҕин туһунан кэпсээтэ, кыра сылдьан хаһыаты хайдахтаах курдук күүтэн-кэтэһэн туран ааҕарын уонна оччотооҕу оҕолор Саха сирин араас муннугар олорор бэйэлэрин саастыылаахтарын кытта суруйсар үгэстээхтэрин эттэ.

Бу тэрээһин, иккис курдук  Саха сиригэр Пионерия күнүгэр эмиэ ананар.

Онон, учууталларын кэппит оччотооҕу оскуола фартуктарын, школьнай форманы билиҥҥи кэм үөрэнээччилэрэ  кэппиттэрэ - эмиэ сонун көстүүнэн буолла.

Гимназиябыт нуучча тылын уонна литературатын учуутала В.И.Илларионова наһаа да истиҥник , оччотооҕу оҕо сааһын санаан туран кэпсээбитэ барыбытын долгутта.

Пионерка Венера Илларионова "Володя Ульянов" дневнигин бастакы сирэйигэр бэчээттэммитин ( хомойуох иһин,  ол хаһыата сүппүт) туоһулуур Н.И.Протопопова илии баттааһыннаах, күөх бэчээттээх дастабырыанньатын архыыбыттан  аҕалан көрдөрдө.

Редакция аатыттан сүрүн редактор С.А.Матвеева оҕолорго туһаайан хаһыат төрүттэммит историятыттан уонна билиҥҥи кэмҥэ бэчээт , ааҕыы суолтатаын туһунан кэпсээтэ.

Икки өттүттэн алтыһыннарыылаах бэрт элбэх сонуннаах история биир сүрүн чахчыта —көлүөнэ көрсүһүүтэ бэрт сэргэхтик ааста.