"Моҕол ураһа" кинигэ сүрэхтэниитэ

    Бүгүн  гимназиябыт 11в кылааһын үөрэнээччитэ Зверева Аня “Моҕол ураһа” диэн кинигэтин  сүрэхтиир дьоро түһүлгэтэ буолан ааста. Аня бу үлэтин кыра кылаастан чинчийэн, үөрэтэн саҕалаабыта. Араас хабааннаах научнай конференцияларга ситиһиилээхтик кыттыбыта. Маннык кинигэ тахсыыта улахан сыраттан, үлэттэн тахсар. Кинигэ ис тутулун, моҕол ураһа тутуутун, туоһу туһаныыны чинчийэн таһаарбытын туһунан, автор сиһилии кэпсээтэ. Үөрүүлээх түһүлгэни 6 «г» кылаас үөрэнээччитэ Иванова Виолетта (сал. Иванова Е.И.) норуот ырыатынан киэргэттэ. Гимназия салалтата уонна чинчийэр үлэҕэ сирдээбит учууталлар кинигэ суолтатын, ис хоһоонун туһунан санааларын эттилэр, эҕэрдэ тылларын анаатылар. Түмүккэ Аня ийэтэ Евдокия Викторовна гимназия иитэр-үөрэтэр истиҥ эйгэтигэр, учууталларга, «Бастыҥнар хамсааһыннарыгар» барҕа махталын биллэрдэ.

Маннык сүдү суолталаах үлэлэри үөрэтэрбит, билэрбит-көрөрбүт  тухары, төрөөбүт төрүт үгэспит, төрүт омукпут культурата сүтүө-симэлийиэ суоҕа!

Ийэлиин ааҕабыт

 Аан дойдутааҕы оскуола библиотекаларын күнүгэр аналлаах декадаҕа, бүтүн Арассыыйатааҕы «Читающая мама — читающая семья — читающая страна» акция чэрчитинэн, 3 «а» кылаас үөрэнээччилэригэр (кыл. сал. Макаров В.Н.) ааҕыы уруогар, ийэлэр Мария Александровна Павлова уонна Вилюяна Васильевна Скрябина, Н.Е. Мординов – Амма Аччыгыйа «Тоҕус төгүл тоҕо?»  айымньытыттан аахтылар.

Үөрэнээччилэр ийэлэр кэпсээн аахпыттарын олус болҕомтолоохтук, сэҥээрэн иһиттилэр. Аахпыт айымньыларын тула санааларын этэн истиҥник сэһэргэстилэр. Маннык көрсүһүүлэр сонун тыыны киллэрэн, дьиэ кэргэнинэн ааҕыы үгэстэрин үйэтитиигэ төһүү күүс буолаллар.

Истиҥ бэлэх

 

Алтынньы ый аан дойду үрдүнэн оскуола библиотекаларыгар анаммыт ый буолар. Бу ый устата араас хабааннаах ааҕыыны көҕүлүүр тэрээһиннэр ыытыллаллар. Ол чэрчитинэн, 5 “в” кылаас үөрэнээччилэрэ уонна төрөппүттэрэ кылаастарын салайааччытын Сайнара Трофимовнаны кытта гимназия библиотекатыгар ааҕар кинигэ бэлэх ууннулар.  

Кэрэ кэпсээннээх, дьэрэкээн ойуулаах кинигэлэр гимназия үөрэнээччилэрин үөрдэ турдуннар, билиигэ-көрүүгэ сирдээтиннэр.

Маннык ис сүрэхтэн тахсар үтүө хамсааһыны тэрийбит 5 “в” кылаас кэллэктиибигэр барҕа махталбытын тиэрдэбит.