Семен Данилов 100 сааһа

Дьоллоох буолуҥ, бар дьонум!

Ситиһиҥ дьол чыпчаалыҥ!

Сырдаттын олоххутун

Улахан дьол сыдьаайа...

                      С.П. Данилов

Дьокуускай куораттааҕы национальнай гимназияҕа, муус устар 11 күнүгэр, саха народнай поэта Семен Петрович Данилов төрөөбүтэ 100 сылыгар анаан, хоһооннорун көлүөнэнэн ааҕыы, ырыа буолбут хоһооннорун толоруу түһүлгэтэ өрө көтөҕүллүүлээхтик буолан ааста. Эҕэрдэ тылы төрөппүт комитетын бэрэссэдээтэлэ Евсеева А.П., директоры иитэр үлэҕэ солбуйааччы Гоголева С.А. эттилэр.

Ааҕыыга гимназия үөрэнээччилэрэ төрөппүттэрин, эбээлэрин, эһээлэрин, хос эбээлэрин кытта С.Данилов хоһоонноруттан талан уус-ураннык өйтөн аахтылар, ырыа гынан көтүттүлэр.

Ол курдук, Дедюкиннар дьиэ-кэргэн музыкальнай бөлөх тэринэннэр  ыллаан-туойан тэрээһини аспыттара ураты эйгэни үөскэттэ. Саамай саастаах кыттааччыбыт, Шишигин Сулустаан (2 “а” кылаас) хос эбээтинээн, Луковцева Февронья Егоровналыын “Өлүөнэ эбэккэм” ырыаны толорбуттарын сөхтүлэр-махтайдылар, онтон саамай кыра кыттааччыбыт, детсад иитиллээччитэ  Рома Блахиров убайынаан Тимурдуун (5б кылаас)  «Дьол» хоһоонун иэйиилээхтик аахтылар. Түһүлгэбитин ыытааччыларбыт Оксана Васильевна, педагог-библиотекарь, Күндэлиинэ Трофимовна, саха тылын уонна литературатын учуутала, Семен Данилов хоһоонноро ис сүрэхтэн саҕыллар тылларынан сибээстээн испиттэрэ, оскуола-үөрэнээччи-төрөппүт биир ситим буоларын туоһулаата. Бары кыттааччылар, көрөөччүлэр, тэрийээччилэр дууһалыын сынньанан, өрө көтөҕүллэн, ыра санаа кынаттанан тарҕастылар.

Хаартыскалары сиһилии фотогалереяҕа көрүҥ