Читатель

Ийэ тыл, сурук-бичик күнүгэр аналлаах декада биир сүрүн тэрээһинэ олунньу 5 күнүгэр А.Г. уонна Н.К. Чиряевтар ааттарынан Дьокуускай куорат национальнай гимназиятыгар өрө көтөҕүллүүлээхтик буолан ааста.

“Ааҕыы – көлүөнэни ситимниир” бырайыак чэрчитинэн үгэс буолбут дьиэ кэргэн күрэҕэр түөрт ыал кыттыыны ылла:

Алла Прокопьевна, Леонид Николаевич,  уоллара Арчылаан, сиэннэрэ Леола, Амелия Евсеевтэр;

Любовь Егоровна, оҕолоро: Сандаара, Эрхан, эбээлэрэ Аграфена Ильинична Николаевтар;

Луиза Олеговна, оҕолоро: Тимур, Рома Блахировтар;

Анна Васильевна, оҕолоро: Эргис, Дима, Нюргуяна Соловьевтар, эбээлэрэ Валентина Иннокентьевна Атласова.

Күрэҕи 2 “а” кылаас сахабыт сирин киэн туттар, биллиилээх дьоммут тыл туһунан бэргэн этиилэринэн, 7 “б”, 10 “а” кылаас уолаттара “Өксөкүлээх үөтүүлээх тыллара” уус-уран дьүһүйүүнэн арыйдылар.

Кыттааччылар уопсайа 7 түһүмэххэ билиилэрин тургуттулар, айымньылаах үлэлэрин көрдөрдүлэр. Ол курдук, төрөппүттэрбитигэр биир сонун  көрүҥүнэн төрөөбүт тыл историятыттан онлайн-тест буолла. Тыл туһунан дьиэ кэргэн төрөөбүт төрүт тылыгар тапталын уустаан-ураннаан ойуулаан, саха тыла хаһан да сүппэтигэр, симэлийбэтигэр баҕаран туран бэйэлэрэ айбыт хоһооннорун дорҕоонноохтук аахпыттара көрөөччүлэр биһирэбиллэрин ылла.

Бары түһүмэхтэри оруннаахтык педагогическай наука кандидата, гимназиябыт директоры иитэр үлэҕэ солбуйааччыта Светлана Алексеевна Гоголева, ХИФУ доцена, филологическай наука кандидата Наталья Сергеевна Сивцева, Дьокуускай куорат 17№-дээх оскуолатын педагог-библиотекара Пелагея Алексеевна Сивцева сыаналаабыттарын түмүгүнэн:

«Өркөн өй» – Евсеевтэр, «Уус-уран тыл» – Николаевтар, “Сайдам санаалаах дьиэ кэргэн” – Соловьевтар, “Этигэн тыл” – Блахировтар дьиэ кэргэттэрэ анал ааттары ылан Хайҕал сурук, сыаналаах бириис тутан үөрдүлэр-көттүлэр, махтал тылларын эттилэр.

Маннык тэрээһин кэнчээри ыччат, аҕа көлүөнэни утумнаан, Ийэ тыл сүөгэйин-сүмэтин, баайын-дуолун дириҥник иҥэринэн, кэскиллээх суолга үктэнэригэр ыҥыра-угуйа туруо.