Өрөспүүбүлүкэбит судаарыстыбыннаһын күнүн көрсө, саҥа үөрэх дьылыгар, 16-ыс төгүл, «Оҕо саас түмэлин» киинигэр, «Сахам сирин саргыта – Өлүөнэ эбэккэм» («Песнь о Лене-реке») биллэр-көстөр суоллаах-иистээх худуоһунньуктар үлэлэрэ оҕо-аймах көрүүтүгэр турда.
Кэтит Сибиир киэргэлигэр киирбит, аан дойду картатыгар анньыллыбыт, омук-омук умсугуйбут, киһи- аймах кэрэхсээбит, үс үллэр үөстээх, өрөгөйдөөх саргылаах Өлүөнэ эбэбит барахсан, хайыр таас хаххаланан, аата-ахсаана биллибэт, адаар таас хайанан эркиннэнэн, дохсун долгуннанан, ортото көстүбэтэх, улаҕата биллибэтэх, уҥуорбутун булларбатах, кэмэ-кэрдиитэ биллибэтэх модун эбэ хотуммут оччоттон – баччаҕа диэри Сахабыт сирин саргыта буолан, саха норуотун историятын, культуратын, сиэрин-туомун, үгэһин Аар саарга аатырта.
Быыстапкаҕа, Саха Сирин биллиилээх, дьон сэҥээритин ылбыт худуоһунньуктара: Ю.В. Спиридонов, Ф.Г. Макаров, И.И. Корякин, М.Н. Иннокентьева, М. П. Аргунова, Приморья худуоһунньуга В.С. Листровой Өлүөнэ эбэни хоһуйбут үлэлэрэ, ону тэҥэ Роже Даль диэн аан дойдуга аатырбыт французскай пейзажист-худуоһунньук триптих хартыыната ураты көстүүнэн буоллулар. Ол курдук, хас биирдии худуоһунньук ис туруга, төрөөбүт дойдуга муҥура суох истиҥ таптала, бэриниилээх буолуута бу хартыыналар нөҥүө бэриллибиттэр.
Түмэл салайааччыта, Саха Өрөспүүбүлүкэтин үөрэҕириитин үтүөлээх үлэһитэ, педагогическай наука кандидата, Светлана Алексеевна Гоголева, уларыйа турар хартыына быыстапкатын араас предмети кытта алтыһыннаран, холбоон ыытара оҕо болҕомтотун, кэрэхсэбилин өссө ордук күүһүрдэр. Ол курдук, бу «Сахам сирин саргыта – Өлүөнэ эбэккэм» («Песнь о Лене-реке») быыстапканы Өлүөнэ эбэни хоһуйбут хомоҕой тыллаах хоһоонньуттар айымньыларынан гимназиябыт медиакиинин кытта ситимнээн ыыттылар.
Түгэнинэн туһанан, гимназиябыт бары үлэһиттэрин, учууталларын, төрөппүттэрин «Сахам сирин саргыта – Өлүөнэ эбэккэм» («Песнь о Лене-реке») 7 худуоһунньук бииргэ түмүллүбүт үлэлэрин кэрэһэлиир быыстапкаҕа сылдьан көрөргүтүгэр ыҥырабыт!
Комментариев нет:
Отправить комментарий