Муус устар 27 күнэ - Саха өрөспүүбүлүкэтин күнэ.

                                       

1922 сыллаахха муус устар 27 күнүгэр - Саха автономнай Советскай Социалистическай республиката төрүттэммитэ. Ол кэмтэн ыла саха норуотун олоҕор элбэх уларыйыы киирбитэ. Бу Саха сирин улахан историята буолар.        

  

“Сэрии дуораана мин дьиэ кэргэммэр” 

       “Сэрии дуораана мин дьиэ кэргэммэр” кинигэ-альбом балаһыанньата.

Сыала-соруга :

•  Үөрэнээччини  төрөөбүт дойдутугар бэриниилээх буоларга иитии-үөрэтии;
•  Аҕа дойду сэриитигэр Ийэ дойдуларын көмүскээбит хорсун-хоодуот сэрии, тыыл ветераннарын эйэни аҕалбыт, көҥүлү түстээбит кэскиллээх дьыалаларын үйэтитии, албан ааттарынан киэн туттуу.

 Хас биирдии үөрэнээччи бэйэтин чугас аймаҕын Аҕа дойду сэриитигэр кыттыыны ылбытын, эбэтэр сэрии кэмигэр тыылга үлэлээбитин туһунан ахтыы-кэпсээнин суруйан бэлэмниир. Хаартыска угуллара биһирэнэр. Размера А4, сытыары да, туруору да буолуон сөп.

Кинигэ-альбом электроннай варианын, бүттүүн кылаас үлэтин холбоон, solannaaf@mail.ru аадырыска ыытаҕыт.

Кылаастар үлэлэрин муус устар 10 күнүгэр диэри туттараргытын күүтэбит.

«Сэрии дуораана – мин дьиэ кэргэммэр» бырайыак чэрчитинэн көрсүһүү

Саха сиригэр Патриотизм сылынан, Улуу Кыайыы үбүлүөйдээх 75 сылын көрсө «Сэрии дуораана – мин дьиэ кэргэммэр» диэн бырайыак чэрчитинэн гимназия ааҕар саалатыгар 7 кылаас оҕолорун кытта истиҥ көрсүһүү, сэһэргэһии буолан ааста.

Бу көрсүһүүгэ ыалдьыппыт саха эстрадатын артыыһа, ырыаһыт- Иннокентий Лебедев хос эһээтин, Брызгалов Феодосий Захарович, уоттаах сэрии толоонугар сырдык тыына быстыбыт сиригэр, Ленинградскай уобаласка көмүллүбүт братскай могилатын хайдах булбутун уонна онно туруммут уһун айанын үтүө түмүктэрин видеоҕа уһулбутун көрдөрөн, сиһилии кэпсээтэ. Аҕа дойду сэриитин кыттыылааҕа Феодосий Брызгалов олоҕуттан төрөппүт сиэнэ В.Д. Соловьев, хос-хос сиэнэ гимназия 7 кылааһын үөрэнээччитэ Дайаана О. кэпсээтилэр.

Гимназиябыт хас биирдии үөрэнээччитэ бэйэтин дьиэ кэргэнигэр Аҕа дойду сэриитигэр кыттыыны ылбыт хос эһээлэрин, аймахтарын туһунан ахтыыны хомуйан, чинчийэн үлэлэрин сылын аайы хаҥаталлар, кинилэр үтүө ааттарын үйэтитэн альбом-кинигэ оҥорон библиотекаҕа бэлэхтииллэр.